I Kumang Nyera

Aku deka nusi ensera orang di Panggau Libau

Lendat dibiau daun pisang

Aku deka niu ensera orang di Selaku Munju

Aku bekanaka ensera orang Nanga Wong Nugga

Kupan naga bias nyawa enda alah tipang

Aku ngerintai ka pengawa orang di Tinting Panjai

Nya alai enda aku madah layu ilang laya

Semengat aku udah dikurung Manang Kemara

Dalam benda menaga bujang

Enda ku luya ilang besi

Semengat aku udah disimpan Manang Menani

Dalam guci celum ngemelang

Leka ensera ke betansang di nyawa

Baruh rang

Bisi sekali kenu Kumang bisi mantaika

Serebana diri ngagai laki iya

Keling Gerasi Nading Bujang Berani Kempang

Iya serebana laban ensepi tubuh diri

Tak asai ke bisi nyelai berubah mansang

Iya serebana laban ensepi tubuh diri

Tak asai ke bisi nyelai berasai nyegang

De…ambai

Nama-nama mih kebuah tubuh aku tak lain asai

Isi aku tak bangat nyelai enda nyamai de… keling

Nama-nama mih kebuah iya kini amang

Sekumbang kandang bulan keleman

Nyawa ku tak gila anga enda sekeruan-ruan

Tetenguk deka ngulam asam pelam pelenguk

Sekumbang kandang bulan mingkai

Nyawa aku tak gila meraya kemai-kemau

Tetenguk deka makai asam binjai

Ke betangkai merunda panjai mansang

Nyawa aku tak gila meraya udu meradang

Tetenguk deka makai asam kumbang

Ke betaking lentur nunduk

Ukai nya nadai buah asam di menua kitai

Tang nadai siti ulih ngemantupka penenguk nyawa aku

Uji meh dik Keling nguji ngigaka aku

Buah asam nya pia ku Kumang meraya

Enti munyi nya kada enda deka betubuh

Dek tu kumang dua orang

Kada enda deka nyera dik tu kumang, betambah mansang

Entah meh keeling pia ku Kumang ga nyaut

Au… enti dik tetenguk deka makai buah asam nya

Ka pan aku enda limping ngelengka ka pengawa

Lalu ngiga utai nya ke nuan

Tang naka ke ditemu aku di menua kitai ditu

Nadai aku kala meda buah asam ti bansa nya

Pia mega diatu maya musim kelelang nadai buah

Enti aku mindah aku tentu deka nuju menua jauh

Kenu ku cerita ti ditusi sida niang apai

Semina orang ti diau di Tisi Langit baka lilit

Orang di Oenunjang Tangga Bintang

Nya orang ti ngembuan pun asam ti diseraka nuan nya

Agi mega orang ke mangkang pun asam nya

Ending orang ke ukai orang ke sepemakai

Ke sepenemuai enggau kitai

Di rantu jalai kin tentu aku deka betempuh

Enggau mayuh macham penanggul

Aku deka betemu enggau mayuh macam penekul

Aku arapka nuan sabar meh nganti pemulai aku

Sereta selalu besampi pengelikun aku

Sekumbang ke nujah menua orang pia ku Keling

Enti ulih rumban anang mih nuan ngerindang diri

Ku irau ati enggaika anak tua puni sera

Enti anak kitai puni sera iya tau ada menawa

Ada senika timpang pendiau

Nadai penyadi-nyadi enti iya enti enda sebaka

Enggau pendiau anak orang bukai

Pia ku timbal Kumang diau dia

Au meh sulu sepenyampat bulih buah asam nya

Ngenyampat nya mega aku nguji mulai ka diri

Aku enggai gi rindang diri sebelah menua orang

Kebata pengawa enggi aku di rumah ditu

Nyau bereba minta kereja

Kebata pengiruh enggi aku ditu

Nyau penuh nguan menua pia ku Keling

Udah nya dia lalu Keling madahka petunggal iya

Laja Lau Mua Penyampu Leka Igi Balang

Ke diau di bilik sepiak

Aku tu ngiruh nuan buat

Enti dek ulih limping aku deka mai nuan

Bejalai ngagai menua bukai

Mai nuan belelang ngagai menua orang

Mai nuan enggau aku ngiga buah asam buat

 Buah pelam pelengok asam binjai

Ke betangkai merundai panjai tampok

Aku deka mai nuan ngiga buah asam kumbang

Ke disera ka ika nuan

Aku enda nyamai bejalai Kediri

Enti nuan mai bejalai

Enggau nuan mega aku buat

Pengawa ke serarih bereba nya enda alah tunda

Pengiruh ke serarih mayuh nya buat

Enda alah keibuh pia ku timbale Laja

Udah nya lalu dipadahka Keling mega petunggal iya

Bungai Nuing Manuk biring enseriban arang enggau Pungga

Lebuh udah datai ba ruai sida Keling

Nyau enggai laun nanya mih Bungai Nuing

Nama utai ke dibai nuan kerandauka kitai buat

Nama utai ke dibai nuan tiu kitai empat tu dih

Nama utai ke dibai nuan kenang kitai empat dih

Tanya bungai Nuing

Kami duai buat tu madahka seduai

Laban madahka diri deka belelang

Ngagai menua orang

Deka bejalai ngagai menua bukai

Laban deka ngiga buah ti diseraka ika nuan

Sekumbang tinggal kami duai mindah ari rumah

Seduai dik meh dikarapka kami duai tu

Ngempung perabung nanggam pemetung di rumah

Seduai nguluka nembiak kitai turun

Nguluka sida mantun ngulu ka sida bumai

Ngulu ka sida empalai

Enti indu anembiak kitai serumah bisi suntuk

Bisi sendat bisi sakit bisi lengit

Seduai dek meh dikarapka kami duai nulung nyukung sida

Enti nembiak bisi betelisih penemu bisi salah jaku

Enti laya semina mesai tunjuk mesai tumpuk

Anang meri iya beregaka manuk, berega ka besi

Pia mih ku Keling

Ngelalau Bungai Nuing sedua Pungga

Ma udah dipanggaika ngagai tandan bau

Alah enggau enda, enggai mih seduai iya

Enda nguji ngema nya

Lalu ku saut Bungai Nuing

Nuan udah nyerahka kuasa ngagai kami duai

Enggau naka ulih kami duai ngibun pengelikun

Indu nembiak di rumah ditu

Anang ga seduai tak ngirau ka ati diri

Pia ku saut Bungai Nuing seduai Pungga

Udah tembu mela diri pagi siti

Lalu begari meh seduai iya ke deka nurun pagi

Dibelit ka seduai ia sirat sekecit

Tau enggau nekang langit gentilang remang

Dibelitka seduai ga sirat kabu

Baka iku kekalau kumpang

Udah nya dipasuka seduai ga simpai rangki

Sepiak siti sepiak siti landai penulang

Udahnya lalu dipasukka seduai iya ga engkerimuk

Tusuk kantuk demam pengerang

Udah nya diempala seduai enggau unus bagus

Pit alus ari runut aping mekang

Udah nya ditangkup ka seduai iya ketapu

Tunjang seribu ujak bulu belayau lelang

Udah nya ditangkin seduai iya nyabur chudur

Pengundur darah legang

Udah nya lalu ditangkin seduai tikai burit

Baka labit madu midang

Udah nya baru seduai masukka gagung

Kulit tegung remaung lubang

Udah nya lalu dima seduai iya buta

Ngena gaga beburit jarang

Tembu nya, nya baru seduai iya

Besan ka enteran bebanang punggang

Enggau bejapai ka terabai

Lantang di gelang

Udah bepasuk ngepan chukup raban nadai timpang

Nyampau meh penyigat gamal keeling seduai Laja

Nyau jindung-jindung meh gamal seduai

Baka bangkung penambang Tawang

Nyau rintu-rintu meh gamal seduai iya

Baka Antu Butu, penunang bini orang

Nyau gelai-gelai meh gamal seduai

Baka mikai nyaruk tapang

Gamal ga ending besai sereta ganggam

Agi ga tinggi nyau begauk meh seduai iya

Enggau semua orang di rumah

Ke ngemata seduai ke deka nurun pegi

Laban deka ngiga buah asam

Ti diseraka Kumang

Ketungkah seduai iya deka nurun

Dia Kumang seduai Lulung

Lalu meri ilum siti siku

Ilum pinang nya ke ubat enda lelak lebuh bejalai

Nyelepak awak menua orang

Tembu nya nyau betujaka tangga meh seduai

Ke deka nurun pegi

Aka dikengkang

Nyau bejengkauka lalau meh seduai

Perasau buluh lalang

Seduai iya bejalai nuju adap matahari mati

Sekumbang ke ditinggalka laki seduai iya pegi

Nyau nganti meh Kumang enggau Lulong di rumah

Nganti laki seduai pulai

Enggau ati ti sabar

Enggau ati chekal

Hari siti nganti

Bulan berganti bulan

Hari beganti hari

Bulan beganti bulan

Tang meh Keling seduai Laja

Ke dianti seduai tak lalu enda tau datai-datai

Ngenangka kandung Kumang

Hari siti nyau besai agi

Hari siti nyau besai agi meh kandung iya mansang

Baka nya mega nyawa iya ke tetenguk

Deka makai buah asam pelam pelenguk

Deka makai asam binjai

Ke merundai panjai tampuk

Enggau asam kumbang ke betekang

Lentur nunduk pan nyau balat-balat

Nya ke ngujungka pendiau tudah tuai

Nyau kurus-sekurus laban merampau

Pia mega, iya nyau enda betah laki iya Keling

Enda nyamai mih tudah tuai

Pansut ke ruai singau-singau

Tama ke bilik lengau-lengau

Nama meh utai ke nanggul Keling seduai Laja

Bangat enda tau pulai-pulai

Nama ke nekul seduai alai enda tau datai-datai

Nya munyi serebana ati

Kumang seduai Lulong ke nganti di menua sida di Panggau Libau

(Besambung..)