Anak Puni Sera

II

Agi menta-enta nyawa tubuh rinda

Baka jala bedau ngaitka mata mengkang di ripang

Agi menga-nga nyawa rinda tubuh

Bela baka asi mata ja semangkang

Lengkaka enda lama iga

Kenang pasal Keling seduai    Laja ke belelang

Ngambi sesempa makai pinang

Tinggalka setangkal gigi tangga

Kena peraka kaki ngayun nyingkang

Kitai ngenang pendiau laki iya di menua

Udah chukup Sembilan bulan Sembilan hari

Nyau radai meg tudah Kumang

Perut iya mula berasai pedis

Iya nyau deka beranak

Maya nya orang bukai semina siku dua

Ke bisi diau di rumah

Sekeda orang indu ken emu iya pedis perut

Lalu besaup ngintu iya

Lebuh orang nekan kandung iya

Nyau keberai ai mata tudah tuai

Iya betatika ka anak diri ke puni sera

Laban Keling ke pegi lalu apin pulai

Iya arapka anak diri tau gerai nyamai

Sebaka enggau anak orang bukai

Ninga anak diri tak nyerarat nyabak

Gaga meh ati tudah tuai

Ninga anak iya nemu nebah nyawa

Enda meh anak iya nya agu enda isu

Tang iya meda gamal anak diri

 Tak nyau baka gamal

anak angkuk kera

Angkuk nyumbuh

Asai ke luluh meh ati tudah tuai

Berasai malu meh tudah tuai

Nyampau meh penusah ati tudah tuai

Sekumbang anak iya udah ada

Iya nadai kala sekali mai anak iya pansut ke ruai

Nadai kala mai anak iya mandi ke ai sungai

Begulai enggau orang bukai

Lalu mimit bendar mih sida serumah

Ke nemu iya bisi beranak mit

Kumang selalu betapok dalam bilik

Diau Kediri, nyau mayuh mih utai dirunding iya

Iya berunding malu ngibun anak ngenyai nya

Enti anak nya dipenyana iya sampai ke besai

Pemalu tentu tetap ngantu pengidup iya sepemanjai umur

Anak nya deka nyadi kea yam tundi orang

Kumang berunding ke pendiau diri empu

Gamal iya nyampau pemajik-majik

Gamal laki iya Keling nyampau penyigat-nyigat

Tang nama kebuah

Petara bangat meri seduai iya

Anak ke enda sebaka enggau anak orang bukai

Kumang bekelikuhka penemu dalam ati diri empu

Nyau enda tinduk meh tudah tuai

Ngenang pendiau anak diri

Runding iya nyau bebalut

Penemu iya nyau tusut

Dia Kumang lalu mutus runding

Deka ngelelang, deka ngemidangka anak iya

Iya berunding deka muai, deka ngesaika anak iya

Ke bedau nemu utai ulu ili nya

Di-idupka nadai meh guna semina ngeribat aja

Anak nya enda nemu pengawa indai iya

Ke nyau enggai begulai enggai sejalai enggau iya

Enda nemu diri nyau enda dipenyana indai iya

Meda mua indai iya semina ketawa aja meh iya

Enda nemu reti utai sekali-kali

Enti perut iya lapar semina nyabak aja meh iya

Enti ati iya puas semina tinduk kenak aja meh iya

Enti indai iya muai ke dalam ai

Tengelam baka batu meh tudah tuai

Enti orang ngantung di pucuk kayu

Begantung baka Rajang meh tudah tuai

Enti indai iya muai iya ke dalam kampong

Gaga ria meh sida semut begigit ka kulit iya

Bepadahka kaban belayan meh bala sida nyamuk

Sida kerengit sida pitak sida kemundang

Berebut nginsap darah tudah tuai

Udah mutuska runding diri

Kumang nengkiraka keresa

Ti deka diberi iya ke anak iya

Macham-macham meh utai diberi indai iya

Diberi iya beliung sebilah

Ngambika bisi dikena iya nebang kayu

Tang beliung nya udah jai peredah

Kumang meri anak iya duku sebilah

Tang meh duku nya udah genting deka patah

Kumang meri anak iya sebilah lungga

Tang meh lungga nya abis tegar dibalut tanah

Kumang meri anak iya gari kelambi

Tang meh ngepan nya nyau abis bechuk-miuk dibalut pengamah

Kumang bisi meri anak iya sepasang simpai enggau engkerimuk

Ngepang nya ending pesaka

Ti selalu dikena Keling lebuh iya agi bujang biak menya

Lebuh ke nengkiraka anak iya

Enda berasai ai mata Kumang labuh keberai

Baka ai ambun pagi ti ngelinchir daun keladi

Gamal anak iya nya udu penyai-nyai

Taja jai agi ga anak nya sebagi ari iya empu

Agi ga nya darah getah purih pantih

Anak telesak iya empu

Tu meh ti ngasuh ati Kumang balat remuk

Balat repuk balat parah balat tusah

Tumu pagi lebuh orang deka angkat dani tinduk

Kumang nurun ari tangga di ujung bilik sida

Anak nya disandik iya

Lebuh kaki iya ngindik tanah

Ambun nyau besebun penuh kampong

Hari jai pan nyau memesi labuh ngerunung

Burung semalau betekuchau nepan di tuga tunggul

Sandah nyau bekeduah munyi keruah babi

Kumang bejalai deka nganjung anak iya

Ngagai kampng ti enda jauh ari ulu rumah sida

Jalai ti ditengah iya agi dijentang pukat empelawa

Nya tanda orang bukai ndai siku

Udah mansa jalai nya dulu ari iya

Ngenangka Kumang ke bejalai mai anak iya tadi

Enda berasi iya udah datai di kampong jerung

Dia kenu Kumang ninga nyawa empeliau

Munyi bekerangau berua di randau kubal tusu

Serebana ga ati iya

Nguwuk meh kita dia dek empiau

Lantang meh ati kita bemain di puchuk kayu

Lebuh ninga ruai ngembau

Serebana ga ati Kumang diau dia

Ngembau meh kita di ruai

Lantang meh ati kita ngeranjai nyerungkai rau

Kumang bejalai mansa batang melintang tinggi

Lalu ensuruk ga iya

Lebuh mansa batang ai melintang gali

Lalu merejuk ga iya

Mansa babas ti repa lalu dibiah

Mansa jalai ti tawas, iya nyingkang kejah-kejah

Tisi langit adap ke timur mansang terang-seterang

Burung enggau jelu semua udah dani magang

Angin pagi agi celap

Ai ambun ti lekat di daun

Ngasuh kaki kain Kumang basah embap-embap

Kumang ngerendut anak iya rat-rat

Anak mit nya tak diau jenuh

Iya enda bemunyi enda nyabak

Iya agi tinduk naka penyenak

Iya baka ke nemu diri badu

Ngasaika penyamai kerendut indai iya

Nya alai ba peluang ti ke penudi iya

Naka ulih ngelantangka ati diri empu

Pagila lusa iya tentu nadai agi

Ngasaika pengangat tubuh indai iya

Pagila lusa iya tentu deka nyadi utai ngapa

Utai ti nadai diguna orang

Anak buai

Anak kesai

Anak tempaya

gambar hiasan

Anak ti enda dipenyana

Iya deka nyabak

Tang nadai orang ke ibuh ke iya

Iya deka berasai celap

Tang nadai indai ti ngerendut

Malut iya ngena pua

Meri iya pengangat ti diguna iya

Iya begunaka pengasih

Tang nadai orang ke sayau ka iya

Merinsa meh tudah tuai

Hari udah tawas bendar

Ati Kumang nyau berasi sinu

Iya malik ngagai mua anak iya

Tang lebuh iya meda gamal anak diri

Tak nyau baka gamal anak angkuk kera

Angkuk nyumbuh

Dia penyinu ati Kumang nyau padam baka api ke dipanjah ai

Kumang enggai agi malik ngagai mua anak iya

Kumang datai di puak kampong

Dia bisi lubang batu ti enda tentu besai

Kumang bejalai nuju lubang nya

Iya beratika lubang nya

Lubang nya likun bendar

Angin dalam lubang nya

Berasai angat agi ari ti diluar

Datai dia Kumang lalu nudukka diri atas batu

Jari iya kebut-kebut ngau mulut tusu indai iya

Kumang nemu anak iya lapar lalu deka nusu

Iya meri anak iya nusu

Anak mit nya lalu jenuh nginsap tusu indai iya

Mulut tusu iya benyut-benyut di-insap anak iya

Iya nusu dataika iya naka pengenyang-ngenyang

Baka ken emu diri deka badu ensepi pemanis ai tusu indai iya

Udah kenyang iya pan tinduk baru

Lebuh anak iya udah tinduk jenak

Kumang ngalika iya ba tilung batu ke likun

Tubuh iya dibalut iya enggau pua

Ti dikena iya nyandik anak mit nya tadi

Semua keresa ti diberi iya ke anak iya

Lalu dibungkus iya ngena kain

Lalu diengkahka Kumang ngimbai anak iya

Udah tembu ngaduka peninduk anak iya

Dia Kumang lalu deka beputar pulai

Ati iya berasi sinu

Ai mata iya labuh bekeberai nelusor kuyu

Kumang malik ngagai mua anak ti benung tinduk

Tekenyit amat meh ati iya

Meda gamal anak iya tak naka pemanah-manah

Ati iya enda kempang deka ninggalka anak iya

Dalam kampung puang nya

Lalu nikal baru ga iya ngagai anak iya

Tang lebuh iya beratika anak iya bebendar

Dia lalu nyau tabar ga pengasih iya

Meda gamal anak iya lebih agi jai ari selama

Lalu enda ga Kumang ngangkatka anak iya

Kumang angkat baru ga ninggalka anak iya

Empai jauh iga udah bejalai ngejangka endur nya

Iya asai ke ninga anak iya kela-kela nyabak

Iya malik ngagai anak ke digalika be teluk batu

Nadai ga iya meda anak nya nyabak

Tang iya asai ka meda gamal anak iya nak penyigat-nyigat

Nadai penimpang

Nadai pengurang

Nikal baru ga tudah Kumang ngagai anak iya

Dia iya meda gamal anak diri nyau baka kerubung antu pala

Mata iya melut

Dilah iya nyelur

Mua iya penuh laban ulat

Tu balat bendar ngenakutka Kumang

Iya lalu ngebuka diri lari

Sereta pulai ke rumah

Mansa batang ti melintang dipansa mansang tadi

Merejuk ga tudah Kumang

Mansa kayu rebah ti tinggi melintang jalai

Ti ditengah iya mansang tadi

Ensuruk ga tudah Kumang

Burung ruai nadai didinga iya agi

Nadai ngembau di puak kampung

Empeliau pan nadai ga didinga iya agi

gambar hiasan

Bekerauh nguwuk di puak kampong

Kampong nyau berasi sunyi

Taja pan maya nya pagi

Taja pan bala burung sigi patut belagu

Semua ama babas baka ti ngulit

Sida baka ti bebasaka penusah ati Kumang

Sida mega baka ke sinu ngenang anak Kumang

Ti ditinggalka indai iya Kediri-diri dalam kampung puang

Lebuh Kumang datai di rumah

Rumah sigi udah puang

Semina orang ke bisi nya bala sida ke tuai-tuai

Enggau bala sida nembiak

Orang ke rumpas-rumpas udah turun magang-magang

Kumang niki ari tangga pelabuh di ujung bilik

Datai di rumah Kumang ngemas bilik sida

Semua gari ti dikena sekumbang ke beranak mit

Dituchi iya magang-magang

Udah rangkai dijembi lalu ditaruh iya

Udah nya nyau beresi meh bilik iya

Nyau nadai mih bekau iya ke udah bisi beranak mit

Dua tiga hari udah nya

Bisi mega orang ti deka ngabas Kumang

Ke baru udah beranak mit

Kumang madahka anak diri enda nyadi kitai

Nya alai nadai meh jalai orang bejaku

Nitihka adat Iban

Enti anak mit tak nadai

Lebuh iya bedau tumboh ngeli

Iya sigi nadai dikebegauka orang sekayu rumah

Tu meh kebuah iya

Pengelenyau anak Kumang nya

Tak nadai dikemegauka orang

Lalu semina Kumang aja meh

Ti nemu penunga anak diri